Hacker vs Cracker

Iha mundo informasaun teknologia (IT) nebe mak moderno no sistema nebe avasandu sei la dok husi ema nebe mak hanaran Hacker no Cracker (uihhhh…ida ne saida fali ??).

Tuir nia baze Hacker no Cracker la’os ema nebe diferente. Hacker no Cracker iha qualidade nebe hanesan. Sira profesional tebes kona ba lalaok seguransa nebe metin iha Rede Internet ( Internet Networking Security). Maibe buat nebe diferente husi Hacker no Cracker mak Hanoin La Hanesan.

Hacker tipo ema nebe gosta kria sistema. Hacker ho nia karakteristika nebe profesional bele hare’e frakeza husi sistema rede ida no depois hadia. Hacker sempre defende sistema ida ho didiak atu nune sistema ne la bele monu alias down. Iha buat barak mak Hacker ne bele halo atu defende nia sistema hanesan kria Sistema Firewall nebe metin. Iha sistema barak mak sei hamrik metin tanba iha kooperasaun diak entre Hacker sira. Ba ita sira nebe mak gosta uza Internet, ita tenke hatene katak tanba Hacker mak ita bele uza Internet hanesan agora.

Hacker mos iha nia kultura mesak, Hacker fiar iha moris liberdade no livre hodi bele fahe informasaun ba malu. Hacker fiar katak informasaun hotu tenki livre, gratuito, transparante, no nakloke ba ema hotu. Ne mak karakter nebe uniku no furak tebes husi hacker ida. Hacker sempre la’o tuir regulamento nebe mak iha hodi respeito ema seluk nia sistema hanesan ninian rasik, maski nia rasik hatene oinsa bele hamate sistema ne. Hacker mak kria buat hotu, Hacker kria internet, Hacker mak halo sistema operasaun hotu. Hacker mos mak kria World Wide Web (WWW) nebe funsiona hanesan ohin loron. Kuando ita bo’ot hola ona parte husi buat sira ne hotu, keta haluha ita bo’ot mos hola ona parte husi Hacker. Ita bo’ot mak Hacker.

Maibe iha ema balun nebe uza sala kona ba informasun. Ema sira ne mak hanaran Black Hacker alias Cracker. Geralmente ema nebe Cracker mak ema foin sae sira ho tinan 15 to 25. Cracker tipo ema nebe gosta tama ba ema nia sistema. Cracker ema nebe oportunista no iha ambisaun nebe bo’ot. Cracker sei la para quando nia objektivu ne seidauk to. Cracker ho nia karakteristika nebe profesional bele hare frakeza husi sistema ida no depois estraga. Iha buat barak mak Cracker ne uza atu hare frakeza husi sistema ida hanesan uza programa scanner SNMP liu husi router ida. Depois de tama ba sistema ida no hetan aksesu hanesan root, Cracker gosta na’ok informasaun nebe importante. Wainhira hetan ona informasaun, Cracker halao instalasaun backdoor hodi buka dalan atu halai sai (he…he…hanesan los naokten ).🙂 🙂 🙂

ATENSAUN :

” Laiha sistema ho pazina web ida mak sei garante 100% seguro iha Cracker ida nia matan ”

Ne duni konkluzaun ikus mak : Hacker Hari’i Cracker Halo rahun.

Ne mak informasaun oituan kona ba se mak Hacker no Crakcer. Maski informasaun iha ne ho karakter teorista oituan maibe sei bele fo vantazen nebe diak mai ita hotu. No mensajen ikus :Mai ita hotu iha hanoin hanesan Hacker.( Kolen deh…!!)

Sampingan | Posted on by | Meninggalkan komentar